Hamiləlik dövründə gələcək analar fizioloji və anatomik dəyişikliklərlə üzləşır. Bu dövrü daha rahat, sağlam, ağrısız və xoş əhval-ruhiyyə ilə keçirtmək üçün hamiləlik pilatesin rolu əvəzolunmazdır.

 

Aztibb.az xəbər verir ki, bu barədə TƏBİB-in icraçı direktorunun müşaviri, fizioterapevt Pərvin Əkbərov məlumat verib.

 

Onun sözlərinə görə, pilatesin məqsədi qarın və kürək bölgələrini bərabər şəkildə gücləndirib, bədənin üst qisimində möhkəm bir skelet yaratmaqdır. Pilatesə görə, bədən mərkəzi dərindəki əzələlərlə bel sümüyünə ən yaxın olan əzələlərindən meydana gəlir.

 

Pərvin Əkbərov qeyd edib ki, hamilə pilatesi onurğanı sabit tutma qabiliyyətini artıran, çanaq dibi əzələlərinin kontrolunu təmin edən, nəfəsi və bədən duruşunu düzəldən, əzələləri gücləndirərək “artan ağırlığı daşıya bilmə“ üçün ideal bir məşq tipidir.

 

Fizioterapevt adi pilateslə hamilə pilatesi arasındakı fərqi də izah edib. Bildirib ki, adi pilatesdə ağırlıq mərkəzi qarın bölgəsinə düşürsə, hamilə pilatesində isə çanaq bölgəsinə düşür. Hamiləliyin daha sağlam keçməsi, onurğa sütununa düşən yükü və ağrıları azaltmaq üçün, ayaqdakı şişkinliklərin qarşısının alınması, doğuşun rahat keçməsi, doğuşdan sonra artmış bədən kütləsinin azalması üçün hamiləliyin 12-ci həftəsindən başlayaraq hamiləlik pilatesi ilə məşğul olmaq tövsiyə olunur.