Azərbaycan Səhiyyə Nazirliyində ölkəmizdə işgüzar səfərdə olan tanınmış neyrocərrah, İsrailin Soroka Universiteti Tibb Mərkəzinin Neyrocərrahiyyə şöbəsinin direktoru Mikki Gideonla görüş keçirilib.

Səhiyyə Nazirliyindən Aztibb.az-a verilən xəbərə görə, qonaqları salamlayan səhiyyə naziri Teymur Musayev bütün sahələrdə olduğu kimi, səhiyyə və tibb elmi sahəsində də əməkdaşlığın nümunəvi olduğunu bildirib. Qeyd edib ki, İsrail yüksək səviyyəli təhsil və səhiyyə sisteminə malik ölkələrdən biridir: "Ölkələrimizin səhiyyənin nəzdində olan yüksək texnologiya - virusologiya, mikrobiologiya və səhiyyənin digər sahələrində əməkdaşlıqdan və qarşılıqlı fəaliyyətindən məmnunuq. Bundan əlavə, Azərbaycan Tibb Universiteti İsrailin Ben Gurion Universiteti və Soroka Tibb Mərkəzi ilə fəal əməkdaşlıq edir”.

Teymur Musayev çıxışında doktor Gideonun karyerası ərzində bir sıra unikal əməliyyatların həyata keçirdiyini vurğulayaraq bildirib ki, onlardan bəziləri neyrocərrahiyyə sahəsində innovativdir: “Eyni zamanda, siz ictimai fəaliyyətlərə də vaxt ayırırsınız. Belə ki, 2021-ci ilin oktyabrında Heydər Əliyev Fondunun dəvəti ilə Bakıya səfər etdiniz. Səfər zamanı Azərbaycan Tibb Universitetinin tələbələri qarşısında çıxış edib, yerli neyrocərrahlarla görüşüb, həmçinin Azərbaycanda klinikalardan birində pasientləntlərə təmənnasız konsultasiya həyata keçirminisiz”.

Sonda Azərbaycan səhiyyə naziri müştərək elmi tədqiqat işlərinin aparılmasının vacibliyini qeyd edib.

Səmimi qarşılanmaya görə minnətdarlığını bildirən doktor Mikki Gideon təmsil etdiyi tibb mərkəzin Azərbaycan Səhiyyə Nazirliyi ilə əməkdaşlıqda maraqlı olduğu bildirib.

Diqqətə çatdırılıb ki, Soroka klinikası İsrailin ən böyük müalicə-diaqnostika mərkəzlərindən biridir. Tibbi mərkəzin müasir avadanlıqları xəstəliklərə ən erkən mərhələdə diaqnoz qoymağa imkan verir ki, bu da öz növbəsində daha dəqiq və effektiv müalicəyə kömək edir.