Mərkəzi Gömrük Hospitalında təcrübə keçəcək Səhiyyə Nazirliyinin 2 nömrəli Bakı Baza Tibb kollecinin tələbələri ilə görüş keçirilib.
Hospitaldan Aztibb.az-a verilən xəbərə görə, görüşdə Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev, Elmi-Təcrübi və Tədris Mərkəzinin mütəxəssisi Şəhla Mirzəzadə, Mərkəzi Gömrük Hospitalının baş tibb bacısı Gülyaz Fərəcova və Hospitalda təcrübə keçəcək tələbələr iştirak ediblər.
Görüş zamanı İsmayıl Əfəndiyev tələbələri salamlayaraq, onlara Tibbi Xidmət İdarəsinin çoxşaxəli fəaliyyəti barədə məlumat verib. O, Mərkəzi Gömrük Hospitalında göstərilən yüksək keyfiyyətli, müasir tibbi xidmətlərdən barədə bəhs edərək tələbələrə təcrübə əldə etmələri, o cümlədən bilik və bacarıqlarını təkmilləşdirmələri üçün yaradılmış imkanlardan maksimum yararlanmalarını tövsiyə edib.
Mərkəzi Gömrük Hospitalının baş tibb bacısı Gülyaz Fərəcova tələbələrin Hospitalın müvafiq şöbələri üzrə növbəli iş planının hazırlandığını qeyd edərək, tələbələrə vəzifə öhdəlikləri barədə məlumat verib.
Daha sonra Elmi-Təcrübi və Tədris Mərkəzinin mütəxəssisi Şəhla Mirzəzadə tibb bacılarının bilik və bacarıqlarının təkmilləşdirilməsi istiqamətində ETTM tərəfindən həyata keçirilən elmi-təcrübi tədbirlər barədə məlumat verib və tələbələr üçün yeni fəaliyyət planı hazırlanacağını vurğulayıb.
Qeyd edək ki, tələbələr 3 aylıq təcrübə müddətində Hospitalın müxtəlif şöbələrində fəaliyyət göstərərək mənimsədikləri nəzəri tibbi bilikləri təcrübədə tətbiq edəcəklər. Tələbələrin diplomqabağı dövlət təhsil istehsalat təcrübəsi müddəti 8 iyun 2023-cü il tarixinədək davam edəcək.
