Səhiyyə Nazirliyinin Psixi Sağlamlıq Mərkəzinin həkim-psixiatrı Cəmilə İsmayılovaya Azərbaycan Respublikasının Prezidenti yanında Ali Attestasiya Komissiyasının (AAK) qərarı ilə tibb elmləri üzrə fəlsəfə doktoru elmi dərəcəsi verilib.

 

Aztibb.az-ın məlumatına görə, o, "Şizofreniya xəstələri və onların ailə üzvlərinin tələbatlarının qiymətləndirilməsi və optimallaşdırılmasına biopsixososial yanaşma" mövzusunda dissertasiya işini uğurla müdafiə edib.

 

Dissertasiya işi şizofreniya xəstələrinin tələbatlarının araşdırılması üzrə ilk işdir. Elmi işdə şizofreniya xəstələrinin ailə üzvlərinə xəstəlik yükünün təsiri haqqında məlumatlar toplanılıb, şizofreniya xəstələri və onların qohumlarının onlara göstərilən xidmətlərdən məmnunluq dərəcəsi dəyərləndirilib, ölkəmizdə tələbatların qiymətləndirilməsi üzrə yeni alətlər sınaqdan keçirilib. Bu tədqiqat yüksək praktik əhəmiyyətə malikdir. Belə ki, şizofreniya xəstələri və onların ailə üzvlərinə gündəlik həyatda və psixiatriya yardımı göstərilməsi zamanı qarşılaşdıqları real problemlər və tələbatların araşdırılmasına həsr edilib.