Səhiyyə Nazirliyində Qana Respublikasının ölkəmizdə yeni təyin olunmuş fövqəladə və səlahiyyətli səfiri xanım Oheneba Lesli Akua Akyaa Opoku-Vare ilə görüş keçirilib.

Nazirlikdən Aztibb.az-a verilən məlumata görə, görüşdə səhiyyə naziri Teymur Musayev Oheneba Lesli Akua Akyaa Opoku-Vareni Qananın ölkəmizdəki səfiri vəzifəsinə təyin olunması münasibətilə təbrik edib.

Teymur Musayev Azərbaycanın Qoşulmama Hərəkatının sədri kimi fəaliyyətindən danışaraq qeyd edib ki, Azərbaycan Respublikasının Prezidenti, Qoşulmama Hərəkatının sədri İlham Əliyev dəfələrlə vaksin millətçiliyini tənqid edib. Ölkə başçısının müraciətindən sonra bu istiqamətdə müsbət nailiyyətlər əldə olunub.

Nazir, həmçinin Azərbaycanın Qoşulmama Hərəkatı çərçivəsində kontakt qrupu ölkələrinin iştirakı ilə gələn ay COVID-19-dan sonrakı dünyaya həsr olunmuş növbəti Sammitə ev sahibliyi edəcəyini də diqqətə çatdırıb.

Bir çox sahələrdə ikitərəfli əlaqələrin inkişaf etdiyini deyən Teymur Musayev milli səhiyyə müəssisələri arasında təcrübə mübadiləsi üçün böyük potensialın olduğunu vurğulayıb. O, Oheneba Lesli Akua Akyaa Opoku-Varenin səhiyyə sahəsində böyük təcrübəyə malik olduğunu qeyd edərək, ölkələrimiz arasında bu istiqamətdə əlaqələrin dərinləşəcəyinə əminliyini ifadə edib.

Səmimi qarşılanmaya görə minnətdarlığını bildirən Oheneba Lesli Akua Akyaa Opoku-Vare Qananın Azərbaycanla münasibətlərin inkişaf etdirilməsinə xüsusi diqqət yetirdiyini bildirib. Qana Prezidentinin 2019-cu ildə Azərbaycana səfərini xatırladan səfir ölkələrimizin beynəlxalq təşkilatlar çərçivəsində səmərəli əməkdaşlığını qeyd edib.

Görüşdə tərəflər səhiyyə və tibb elmi sahəsində əməkdaşlığın mövcud vəziyyətini və potensial inkişaf imkanlarını müzakirə ediblər.