Aztibb.az-ın “Həkimlərimizi tanıyaq!” rubrikasında yüksəkixtisaslı ümumi cərrah, Mərkəzi Gömrük Hospitalının rəis müavini, Baş həkim vəzifəsini müvəqqəti icra edən, t.e.d. Bəxtiyar Musayevi Sizə təqdim edirik.
Bəxtiyar Musayev 1982-ci ildə Azərbaycan Tibb Universitetinin Müalicə-profilaktika fakültəsini bitirib, 1982-1983-cü illərdə Bakı şəhəri 5 saylı klinik xəstəxanada cərrahiyyə üzrə inetnatura təhsili alıb. 2012-ci və 2017-ci illərdə ümumi cərrahiyyə üzrə təkmilləşmə kursu keçib. 1990-cı ildə namizədlik, 2000-ci ildə isə Moskva şəhərində doktorluq dissertasiyalarını müdafiə edib.
O, 1984-1989-cu illərdə Azərbaycan Elmlər Akademiyasının Elmi-Tədqiqat Fiziologiya İnstitutunun nəzdində akademik Böyükkişi Ağayevin təşəbbüsü ilə yaradılmış biliar sistemin fiziologiyası və cərrahiyyəsi üzrə akademik qrupun əvvəl kiçik, sonra isə böyük elmi işçisi vəzifəsində işləyib. 1989-2000-ci illərdə yeni yaradılmış ET Qastroenterologiya İnstitutunda fəaliyyətini davam etdirib.
Eyni zamanda, 1984-2018-ci illərdə 5 saylı kliniki xəstəxanada cərrah, o cümlədən 2000-2011-ci illərdə həmin xəstəxanada Cərrahiyyə şöbəsinin müdiri, 2004-2016-cı illərdə bir neçə özəl tibb müəssisəsində baş həkim vəzifələrində çalışıb. 2018-ci ildən Mərkəzi Gömrük Hospitalında ümumi cərrah və müalicə işləri üzrə rəis müavini, 2022-ci ilin dekabr ayından isə Gömrük Hospitalında Baş həkim vəzifəsini müvəqqətti icra edir.
Bəxtiyar Musayev ölkəmizdə endoskopik əməliyyatları ilk aparanlardan biridir. Belə ki, 1982-ci ildən diaqnostik laparoskopik müdaxilələr, 90-cı illərin ortasından isə endoskopik cərrahi müdaxilələri icra etməyə başlayıb. Keçmiş SSRİ məkanında qaraciyərin funksiyaları və perkutan qaraciyər daxili müdaxilələrin aparılmasında pionerlərdən olaraq ilk dəfə 1984-cü ildən başlayaraq ölkəmizdə bu əməliyyatları icra edib.
Həkim ümumi cərrahiyyə və qastroenterologiya sahəsində, o cümlədən qaraciyər, öd kisəsi və öd axarları, mədəaltı vəzi, qida borusu, mədə, nazik və yoğun bağırsaq, dalaq xəstəlikləri üzrə təcrübəli mütəxəssis olaraq qarın boşluğu üzvləri üzərində bütün növ açıq və laparoskopik əməliyyatları həyata keçirir.
O, daim dünya tibb aləmində baş verən hadisələri izləyir, tibbin nailiyyətlərini öyrənir və işini müasir texnologiyalara əsaslanaraq qurur. B.Musayev öz işlədiyi dövrdə ölkəmizdə və xaricdə keçirilən onlarla konfrans, simpozium və konqreslərdə iştirak edib. 2019-cu ildə Birləşmiş Ərəb Əmirliklərində “Ərəb-Sağlamlıq-2019” tibb sərgisində, eyni ildə Türkiyənin İstanbul şəhərində Florence Nightingale Xəstəxanalar Qrupunda xəstəxana işinin təşkili, infeksion nəzarət sahəsində təcrübə mübadiləsi və qarşılıqlı əməkdaşlıq çərçivəsində təkmilləşdirmə kursunda, Türkiyənin Antalya şəhərində “Dezinfeksiya, Antiseptika və sterilizasiya” üzrə praktiki kursda iştirak edib. Bəxtiyar həkim 50-dən yuxarı elmi məqalənin, 1 ixtiranın, 3 səmərələşdirici təklifin və 3 metodik tövsiyənin müəllifidir.