Mədə kiçiltmə əməliyyatından sonra ilk üç ayda ədviyyatlar, qəhvə, karbohidratlı qidalar, çiy tərəvəzlər, tomat pastası, limon, çoxlu miqdarda duz və şəkərdən istifadə qadağandır. Bundan əlavə, ilk 6 ayda spirt və qazlı içkilərdən uzaq olmaq lazımdır.

 

Aztibb.az xəbər verir ki, bu barədə ümumi cərrah Rəşad Əkbərli məlumat verib.

 

Həkim mədə kiçiltmə əməliyyatından sonra bədəndə tikiş, çapıq izinin qalması məsələsinə də aydınlıq gətirib. Bildirib ki, mədə kiçiltmə əməliyyatı qapalı üsulla (laparoskopik) icra edilir. Bu zaman qarında 1 sm-lik 4 kəsik yeri olur. Bu kəsiklər estetik tikişlərlə bağlandığı üçün zamanla dəridə çapıq izi qalmır.

 

Rəşad Əkbərli qeyd edib ki, əməliyyatdan sonra ilk müayinə 15-ci gündə, ikinci müayinə isə birinci ayda aparılır. Sonrakı 3, 6, 9 və 12-ci aylarda xəstələrin qan analizlərinin nəticəsi ümumi cərrah və dietoloq tərəfindən yoxlanılır.