Tibbi Ərazi Bölmələrini İdarəetmə Birliyinin (TƏBİB) tabeliyində fəaliyyət göstərən “Yeni klinika” tibb müəssisəsində növbəti tibbi seminar keçirilib.

“Yeni klinika”dan Aztibb.az-a bildirilib ki, tibb müəssisəsinin direktor vəzifəsini icra edən baş həkim Cavid Paşayevin iştirakı ilə baş tutan seminarın keçirilməsində əsas məqsəd tibbin ən vacib mövzularında araşdırmaların aparılması və bu yöndə kollektiv müzakirələrin təmin edilməsidir.

Tədbirdə həkim-terapevt Səbinə Fərzəliyeva “Pulmonar Tromboemboliya” (PTE) xəstəliyi haqqında araşdırma apararaq geniş təqdimatla çıxış edib.

O, xəstəliyin 3 böyük risk (major, orta və aşağı) faktorları, əlamətləri, müayinə və müalicəsi barədə məlumat verərək, xəstəliyin vaxtında diaqnostikası və zaman itirmədən müalicəsinin ölüm riskini azaltdığını qeyd edib.

PTE xəstələrinin daha çox dispnoe (nəfəs darlığı), taxipnoe (sürətli nəfəs), ciddi sinə ağrısı və hemoptiziya (qanhayxırma) kimi şikayətlərlə müraciət etdiyini bildirən məruzəçi risk vəziyyətini dəyərləndirmək üçün klinikada “Wells” və “Cenevrə” skorlarından istifadə olunduğunu bildirib.

Xəstəliyin müalicə metodları haqqında geniş müzakirələrin aparıldığı seminar sual-cavab sessiyası ilə yekunlaşıb.