Sumqayıt Tibb Mərkəzinin (STM) tabeliyindəki 1 nömrəli Şəhər Xəstəxanasının Poliklinika şöbəsində növbəti maarifləndirici seminar keçirilib.

Bu barədə Aztibb.az-a STM-dən məlumat verilib.

Bu dəfəki seminarda Poliklinika şöbəsinin həkim-onkoloqu Vüsal İbrahimov “Mastopatiya və süd vəzi xərçəngi” mövzusunda təqdimatla çıxış edib. Tibb müəssisəsinin, habelə STM-in tabeliyində olan ailə sağlamlıq mərkəzlərinin həkimlərinin qatıldığı seminarda onkoloq Vüsal İbrahimov süd vəzi xərçənginə daha çox qadınlarda rast gəlindiyini diqqətə çatdırıb.

V. İbrahimov bildirib ki, süd vəzisində həm xoşxassəli, həm də bədxassəli şişlər inkişaf edə bilər. Qeyd edib ki, mastopatiya əsasən dölyaratma yaşında inkişaf edir.

Vurğulayıb ki, mastopatiyanın ilk əsas səbəbi qadın orqanizmində hormonal tarazlığın pozulmasıdır. Onkoloq mastopatiyanı yaradan səbəblərdən, simptomlardan, süd vəzinin dishormonal proseslərindən, BİRADS təsnifatından və diaqnostikadan geniş bəhs edib.

Qarşılıqlı fikir mübadiləsi şəraitində keçən seminarda iştirakçıları maraqlandıran suallar cavablandırılıb.

Qeyd edək ki, seminarda 1 nömrəli Şəhər Xəstəxanasının baş həkimi Mətləb Musayev, xəstəxananın Poliklinika şöbəsinin müdiri Arzu Bəndəliyeva və Doğum şöbəsinin müdiri Təranə Qarayeva da iştirak edib.