İcbari Tibbi Sığorta üzrə Dövlət Agentliyinin Şəki regional filialının və Zaqatala Rayon İcra Hakimiyyətinin birgə təşkilatçılığı ilə Heydər Əliyev Mərkəzində “İcbari tibbi sığorta haqqında” mövzusunda maarifləndirici tədbir keçirilib.
Zaqatala Rayon Mərkəzi Xəstəxanasından Aztibb.az-a bildirilib ki, tədbirdə müəssisənin direktoru Tamara Nurəliyeva, xəstəxananın digər əməkdaşları, rayonun ayrı-ayrı müəssisə nümayəndələri iştirak ediblər.
Əvvəlcə Tamara Nurəliyeva icbari tibbi sığortanın tətbiqi ilə səhiyyə sistemində yaradılmış köklü dəyişikliklərdən danışıb. O, əhalinin daha etibarlı və keyfiyyətli tibbi xidmətlərdən istifadə imkanlarının artdığını qeyd edib.
Daha sonra İcbari Tibbi Sığorta üzrə Dövlət Agentliyinin Şəki regional filialının rəhbəri həkim Laçın İbrahimxəlilov tədbir iştirakçılarına icbari tibbi sığorta sistemi haqqında məlumat verib. O, öz çıxışında icbari tibbi sığorta sisteminin ölkədə mərhələli tətbiqi, xidmətlər zərfi, bura daxil olan və olmayan tibbi xidmətlər, icbari tibbi sığortanın maliyyələşmə mənbələri, icbari tibbi sığorta haqları və s. haqqında məlumatları iştirakçıları diqqətinə çatdırıb.
Sonda icbari tibbi sığorta sisteminin tətbiqinə dair suallar cavablandırılıb və belə tədbirlərin davamlı olaraq keçirilməsinin zəruriliyi qeyd olunub.