Düyünlü Guatrı olan xəstələrin çoxunda demək olar ki, heç bir şikayət olmur. Bu xəstələrdə düyünlərin aşkarlanması çox vaxt pasiyentin başqa bir səbəbdən həkimə gəlməsi nəticəsində olur. Düyünlər fiziki müayinə (həkimin əl ilə yoxlaması) və ya tiroidə aid olmayan görüntülü diaqnostik müayinələrdə aydınlaşır.

 

Həkimin sözlərinə görə, tiroid vəzin içindəki düyün çox vaxt kənardan gözlə ayırd edilmir. Çox az sayda xəstə boynundakı şişliyi özü və yaxınları hiss edib, həkimə gedir. Bundan başqa, çox az xəstə qrupu bu düyünlərdən normadan çox ifraz olunan tiroid hormonuna (hipertiroizdizm) dair şikayətlərlə həkimə müraciət edir.

 

"Təəssüf ki, bir çoxları düyünlər aşkarlansa belə ətraflı müayinəni və diaqnozun təsdiqini ehmal edirlər, "ciddi bir şeyim yoxdur", deyib getmək istəyirlər. Halbuki araşdırmalar göstərir ki, bu düyünlərin 5%-i tiroid xərçəngi ola bilər. Bu səbəbdən də pasiyentlərə məsləhətimiz, müayinə əsnasında tiroid düyünündən şübhə edilirsə, həkimin dediklərini gözardı etmədən, pillə-pillə bütün müayinələrdən keçməli, həkimin göstərişi olan müalicəni yerinə yetirməlisiniz", - Fərhad Burzu bildirib.