Vətəndaşların sağlamlığının qorunması, göstərilən tibb xidmətinin səviyyəsinin və keyfiyyətinin yüksəldilməsi dövlət siyasətinin prioritet istiqamətlərindən biridir.

 

Azərbaycan Respublikasının Prezidenti İlham Əliyevin rəhbərliyi ilə ölkəmizdə səhiyyə sahəsində uğurlu islahatlar aparılır. Ən müasir avadanlıqlarla təchiz olunmuş yeni tibb ocaqları tikilir, səhiyyə xidmətinin yaxşılaşdırılması istiqamətində ardıcıl, təxirəsalınmaz tədbirlər görülür.

 

Dövlətimizin başçısının tövsiyəsi ilə vətəndaşların hər il tibbi müayinələrə cəlb edilməsi kampaniyası Tərtər rayonunda da uğurla davam etdirilir.

 

Tərtər Rayon Mərkəzi Xəstəxanasından Aztibb.az-a bildirilib ki, xəstəxananın peşəkar həkim və tibb işçilərindən ibarət geniştərkibli briqadasının iştirakı ilə rayonun Bəyimsarov kəndinin sakinləri kütləvi tibbi müayinələrə cəlb olunublar.

 

Əsas məqsəd rayonun kəndlərində Tərtər RMX-na gəlməkdə maddi və fiziki çətinliyi olan xəstələrin yerindəcə müayinə edilməsidir.

 

Həkim briqadasının tərkibində terapevt, pediatr, mama-ginekoloq, laborant, şüa-diaqnostika və başqa ixtisas həkimləri var.

 

Aksiya zamanı 44 nəfər şüa-diaqnostika, 17 nəfər pediatr, 19 nəfər ginekoloq, 24 nəfər qan analizi, 47 nəfər isə terapevt tərəfindən müayinə olunublar.

 

Kənd sakinləri onlara göstərilən tibbi xidmətin səviyyəsindən razı qaldıqlarını bildiriblər.