Uzman həkim-cərrah, tibb xidməti baş leytenantı Vüsal Cəfərov Mərkəzi Gömrük Hospitalının Uşaq cərrahiyyəsi şöbəsinin rəisi təyin edilib.

 

Mərkəzi Gömrük Hospitalından Aztibb.az-a verilən xəbərə görə, Vüsal Cəfərov 2016-cı ildən Hospitalın Uşaq cərrahiyyəsi şöbəsində uşaq cərrahı vəzifəsində çalışıb.

 

Qeyd edək ki, Vüsal Cəfərov 2009-cu ildə Azərbaycan Tibb Universitetinin Pediatriya fakültəsini bitirdikdən sonra 2011-2016-cı illərdə İstanbul Cərrahpaşa Universitetinin Tibb fakültəsinin Uşaq Cərrahiyyəsi və Uşaq Urologiyası bölməsində uzmanlıq təhsili alıb. Vüsal həkimin uşaq cərrahiyyəsi sahəsində apardığı əməliyyatların sayı 5000-i ötüb.

 

O, uşaqlarda anadangəlmə inkişaf qüsurlarının, yenidoğulmuş uşaqların cərrahi problemlərinin, uşaqlarda rast gəlinən təcili patologiyaların müalicəsi üçün aparılan əməliyyatları, həmçinin müxtəlif növ uşaq uroloji əməliyyatlarını, həm açıq cərrahiyyə, həm də laparoskopik üsulla icra edir. 

 

Vüsal Cəfərov Türk Təbiblər Birliyinin, Türk Uşaq Cərrahiyyəsi Dərnəyinin və Türk Hipospadiya Dərnəyinin üzvüdir.