Almaniyanın Würzburg şəhərində DAMV-ın (Alman-Azərbaycan Tibb İşçiləri Birliyi) illik hesabat yığıncağı çərçivəsində Almaniyada çalışan azərbaycanlı həkimlərin görüşü keçirilib.
Aztibb.az-ın məlumatına görə, tədbir zamanı müxtəlif mövzularda təqdimatlar və interaktiv müzakirələr aparılıb.
Uzun illər Almaniyanın müxtəlif klinikalarında çalışmış azərbaycanlı həkimlər öz təcrübələrini gənc həmkarları ilə bölüşüb, onlara Almaniyada həkim karyeraları müddətində qarşılaşa biləcəkləri müxtəlif problemli situasiyalardan necə çıxa biləcəkləri ilə bağlı tövsiyələr veriblər.
Görüşdə DAMV-nın rəhbəri, plastik və rekonstruktiv cərrah Abbas Əhmədli azərbaycanlı həkimlər arasında əlaqələrin önəmindən bəhs edib. Uzun illər Almaniyada fəaliyyət göstərən, azərbaycanlı həkimlərə hər cür dəstək vermiş ümumi cərrah Vüqar Yaqublu isə ölkə xaricində yaşayan və çalışan həkimlərimizin Azərbaycan səhiyyəsinin inkişafında və mövcud problemlərin aradan qaldırılmasında yaxından iştirak etməsinin labüdlüyündən danışıb.
Tədbirin gedişində baş tutan diskussiyalar zamanı azərbaycanlı həkimlər arasında şəbəkələşmənin və təcrübə mübadiləsinin vacibliyi vurğulanıb, bu yöndə müxtəlif fəaliyyətlərin həyata keçirilməsinə dair qərar verilib.
Qeyd edək ki, DAMV 2021-ci ildə Almaniyada müxtəlif klinikalarda fəaliyyət göstərən azərbaycanlı həkimlər tərəfindən təsis edilib və bugünə qədər bir çox uğurlu layihələrə imza atıb.
