“Həkimlərimizi tanıyaq!” rubrikamızda Sizə Mərkəzi Gömrük Hospitalının Tibbi laboratoriya şöbəsinin həkim-biokimyaçı Reyhan Əliyevanı təqdim edirik.
Həkim-biokimyaçı Reyhan Əliyeva 1997-ci ildə Azərbaycan Tibb Universitetinin Tibbi-profilaktika fakültəsini bitirib, 1997-1998-ci illərdə Bakı şəhəri Gigiyena və Epidemiologiya Mərkəzində həkim-laborant ixtisası üzrə internatura keçib. 1998-2009-cu illərdə Azərbaycanın müxtəlif dövlət tibb müəssisələrində həkim-biokimyaçı işləyib, 2009-cu ildən Mərkəzi Gömrük Hospitalının Tibbi laboratoriya şöbəsində həkim-biokimyaçı kimi fəaliyyət göstərir.
O, Mərkəzi Gömrük Hospitalının Tibbi Laboratoriya şöbəsində biokimyəvi, immunoseroloji, kliniki müayinələrin aparılması ilə məşğul olur.
Reyhan Əliyeva pedaqoji fəaliyyətlə də məşğul olub. Belə ki, 2004-2013-cü illərdə Bakı Slavyan Universitetinin Tibbi biliklərin əsasları və mülki müdafiə kafedrasında baş müəllim işləyib. O, peşəsini sevən, özünə qarşı tələbkar, işində çox diqqətcil, müasir tibb elminin nailiyyətlərini izləyən, sahəsi ilə bağlı yenilikləri tətbiq edən yüksəkixtisaslı mütəxəssisdir.
Həkim 2001-ci ildə Respublika QİÇS-lə Mübarizə Mərkəzinin HİV-in laborator diaqnostikası sahəsində ilkin ixtisaslaşdırılma haqqında sertifikata layiq görülüb, 2009-cu Almaniyanın “Roche Diagnostics” şirkətinin Cobas 4000 C-311 analizatorlarında tədris kursunu keçib, 2021-ci ildə Klinik Biokimya Uzmanları Dərnəyinin təşkilatçılığı ilə keçirilən simpoziumda, Azərbaycan Tibb Universitetinin təşkilatçılığı ilə keçirilən “Süni intellektə əsaslanan Mikrobiom Analizi” mövzusunda simpoziumda, 2022-ci ildə COVID-19 və xəstəxanadaxili infeksiyalar” və “Sars-CoV-2/COVID-19 kompleks diaqnostikasına müasir yanaşmalar” mövzularında beynalxalq konfranlarda iştirak edib.
Reyhan Əliyeva işlədiyi illər ərzində nümunəvi xidmətinə görə 2019-cu ildə Azərbaycan Respublikası Dövlət Gömrük Komitəsi tərəfindən “Gömrük organlarında xidmətə görə” 3-cü dərəcəli döş nişanı və 2022-ci ildə Dövlət Gömrük Komitəsi tərəfindən Fəxri fərmanla təltif olunub.