Sumqayıt Tibb Mərkəzi (STM) müalicə alan pasiyentlərin keyfiyyətli qida ilə təmin olunmasına xüsusi diqqət yetirir.

 

STM-dən Aztibb.az-a verilən məlumata görə, STM-in tabeliyində olan xəstəxanalarda müalicə alan pasiyentlər gündə 3 dəfə qida ilə təmin olunur.

 

Gün ərzində 500-dən yuxarı xəstənin qida ilə təmin olunması STM-in Mərkəzi mətbəx bölməsinin növbəli qrafiklə çalışan 40 əməkdaşı tərəfindən həyata keçirilir.

 

Beynəlxalq standartlara uyğun tərtib olunmuş müxtəlif adda “pəhriz stolları” xəstələrə təyin edilmiş diaqnozlara uyğun və hər kəsə individual olaraq hazırlanır. Yeməklər xəstələrin sayına əsasən müxtəlif çeşidlərdə hazırlanır, xüsusi maşınlarla xəstəxanalara daşınır, burada isə son qablaşdırma işləri aparılaraq, palatalara paylanılır.

 

Yeməklər steril qaydada, xüsusi termobokslarda çatdırılır. Hər gün təzə tərəvəzlərdən və keyfiyyətli ərzaqlardan hazırlanan yeməklərdən nümunə götürülür və hər hansı bir zəhərlənmə ehtimalına qarşı bu nümunə 72 saat ərzində saxlanılır. Nümunənin üzərində yeməyi bişirən şəxsin adı və tarix qeyd edilir.

 

Qidaların keyfiyyətinə və göstəricilərinə həkim-dieotoloq Bəturə Əhmədxanlı nəzarət edir.

 

Səhər yeməyində adətən xəstələrə kəsmik, pendir, yağ, cem, yumurta, sıyıq, yulaf verilir. Nahar vaxtı isə xəstələrə iki növ yemək verilir.

 

Nahar menyusunda adətən aş, səbzi, qarabaşaq, toyuq supu, borş, dovğa və digər yeməklər olur.