Dövlət Gömrük Komitəsi Hava Nəqliyyatında Baş Gömrük İdarəsində “Psixotrop maddələr, yeni növ sintetik narkotik vasitələr, hallüsinogenlər və prekursorlar” mövzusunda təlim keçirilib.

Mərkəzi Gömrük Hospitalından Aztibb.az-a verilən məlumata görə, tədbirdə Hava Nəqliyyatında Baş Gömrük İdarəsinin rəisinin birinci müavini, rəis vəzifəsini müvəqqəti icra edən Anar Cahangirov narkomaniya ilə mübarizənin dövlət əhəmiyyətli prioritet istiqamətlərdən biri olduğunu vurğulayıb.

Daha sonra Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev “Narkotik vasitələr və psixotrop maddələr: müasir dünyanın qlobal çağırışı” mövzusunda, Mərkəzi Gömrük Hospitalının həkim-psixiatrı İradə Ramazanova “Çağdaş dövrdə psixotrop dərmanların yaratdığı problemlər”, Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin mütəxəssisi Azad Əhmədov “Saxta dərman vasitələri və onların yayılmasına qarşı mübarizə” mövzularında təqdimatlarla çıxış ediblər.

Təqdimatların sonunda iştirakçıları maraqlandıran suallar cavablandırılıb.

Qeyd edək ki, müvafiq təlim Dövlət Gömrük Komitəsinin müvafiq sərəncamı əsasında Komitə aparatı ilə yanaşı, Komitənin ərazi və ixtisaslaşdırılmış gömrük idarələri və digər qurumlarında da 2023-cü il ərzində həyata keçiriləcək.