Hamiləliyin 31-ci həftəsində Səhiyyə Nazirliyi Elmi-Tədqiqat Mamalıq və Ginekologiya İnstitutunda dünyaya gələn üçəmlər vəziyyətləri ilə əlaqədar Yenidoğulmuşların reanimasiya və intensiv terapiyası şöbəsinə köçürülüblər. 1130, 1870 və 1730 qram çəkidə dünyaya gələn körpələr həkim-neonatoloq Günel Xəlilovanın nəzarətində olublar.
Elmi-Tədqiqat Mamalıq və Ginekologiya İnstitutundan Aztibb.az-a verilən xəbərə görə, vaxtından əvvəl doğulma, tənəffüs pozğunluğu, infeksiya, beyin qan dövranı pozğunluğu, I dərəcəli qansızma diaqnozları ilə daim nəzarətdə olan körpələr CPAP dəstəyində olublar. Davamlı olaraq şüa-diaqnostika üzrə həkim Təranə Kərimova tərəfindən icra olunan ultrasəs müayinələr və G.Xəlilovanın nəzarəti ilə aparılan digər yoxlanışlara uyğun təyin olunan müalicə planı ilə üçəmlər artıq CPAP dəstəyinə ehtiyac qalmadan normal fizioloji şöbəyə köçürülüblər.
Hazırda hər üçü kişi cinsli olan körpələrin vəziyyəti stabildir.
