Aztibb.az "Həkimlərimizi tanıyaq!" rubrikasında Qubadlı Rayon Mərkəzi Xəstəxanasının həkim-endokrinoloqu Şirvan Zəkəriyəyevi təqdim edir. 

 

Şirvan Natiq oğlu Zəkəriyəyev 1995-ci ildə Qəbələ rayonunun Abrıx kəndində doğulub. 2012-2018-ci illərdə Azərbaycan Tibb Universitetinin Müalicə işi fakültəsində təhsil alıb.

 

O, 2018-2022-ci illərdə Azərbaycan Tibb Universitetinin Tədris Terapevtik Klinikasında "Endokrinologiya" ixtisası üzrə rezidentura keçərək həkim-mütəxəssis ali peşə-ixtisas dərəcəsi alıb.

 

Gənc həkim "İzsiz tiroidektomiya" adlı elmi-praktiki konfransda, "Mamalığın aktual problemləri" elmi-praktik konfransında iştirak edib. 2021-ci ildə Türkiyə Cümhuriyyətinin Bağcılar Eğitim və Araşdırma Xəstəxanasında "Tiroid vəzin USM müayinəsi zamanı şübhəli düyünlərin araşdırılması və düyünün "İncə İynə Aspirasyon Biopsiyası (İİAB)" üzrə kurs keçib. Əlavə olaraq bir sıra seminar və konfranslara qatılıb.

 

Şirvan Zəkəriyəyev, həmçinin Tədris Terapevtik Klinikada işlədiyi müddətdə COVID-19 infeksiyası ilə mübarizədə iştirak edib, Vətən müharibəsi dövründə yaralıların müayinə və müalicəsinə həkim-endokrinoloq kimi yaxından köməklik göstərib. O, 15 dekabr 2022-ci il tarixində Qubadlı Rayon Mərkəzi Xəstəxanası PHŞ-da həkim-endokrinoloq vəzifəsinə təyinat alıb.