Səhiyyə Nazirliyi Elmi-Tədqiqat Mamalıq və Ginekologiya İnstitutunda 20 Yanvar şəhidlərinin xatirəsinə həsr olunmuş tədbir keçirilib.

Bu barədə Aztibb.az-a İnstitutdan məlumat verilib.

Öncə şəhidlərin xatirəsi bir dəqiqəlik sükutla yad edilib.

İnstitutun direktoru, t.e.d., professor Cəmilə Qurbanova açılış nitqi ilə çıxış edərək, Vətənimizin azadlığı, bütövlüyü uğrunda canlarından keçmiş bütün şəhidlərin ruhlarına rəhmət, qazilərə Allahdan səbir diləyib.

Daha sonra müəssisənin YAP təşkilatının sədri Ədalət Əliyev xalqımızın azadlıq mübarizəsinin ən bariz nümunəsi olan həmin gecə yaşananlardan danışıb. O, faciəli günlərdə Azərbaycan xalqının haqq səsini Moskvadan bütün dünyaya çatdıran Ümummilli Lider Heydər Əliyevin xüsusi xidmətlərini vurğulayıb. Bildirib ki, 20 Yanvar hadisələri zamanı olduğu kimi, 44 günlük Vətən Müharibəsində də xalqımızın birlik ruhunun, bir yumruq kimi birləşməsinin şahidi olduq.

İnstitutun Həmkarlar İttifaqı Komitəsinin sədri Kəmalə Heydərova öz çıxışında dinc əhaliyə qarşı törədilən hadisənin acı nəticələrindən, xalqımızın birliyindən söz açıb. 

Səhiyyə Nazirliyinin mütəxəssis-eksperti, ETMGİ-nin Yenidoğulmuşların Reanimasiya və İntensiv Terapiyası şöbəsinin müdiri Rüstəm Hüseynov 20 Yanvar tarixinin xalqımızın yaddaşında istiqlal mübarizəsinin qələbəsi kimi həkk olunduğunu deyib. Mövqeyindən asılı olmayaraq hər bir vətəndaşın könüllü şəkildə mübarizə apardığını dönə-dönə vurğulayan R.Hüseynov bunun bizim vətəndaşlıq borcumuz olduğunu bildirib.