Aztibb.az xəbər verir ki, öncə Azərbaycanın bütövlüyü uğrunda canlarını fəda edən şəhidlərin ruhu bir dəqiqəlik sükutla yad edilib.

 

Tədbiri giriş sözü ilə açan STM-in direktoru Səkinə Sadıxova bildirib ki, Azərbaycan 1991-ci ilin oktyabr ayında müstəqilliyini bərpa etsə də, əslində bu müstəqilliyi 1990-cı il yanvar ayının 19-dan 20-nə keçən gecə qazanıb.

 

Qeyd edib ki, 1990-cı il yanvarın 20-si Azərbaycanın müasir tarixinə ən faciəli günlərdən biri, eyni zamanda, xalqımızın qəhrəmanlıq səhifəsi kimi daxil olub, milli müstəqillik, azadlıq uğrunda mübarizəsinin və yenilməz iradəsinin rəmzinə çevrilib.

 

Vurğulayıb ki, həmin vaxt Moskvada yaşayan xalqımızın dahi oğlu Heydər Əliyev faciənin ertəsi günü Azərbaycanın daimi nümayəndəliyinə gəlib, Qanlı Yanvar qırğınını törədənləri pisləyən kəskin bəyanatla çıxış edərək xalqımızın başına gətirilən müsibəti dünyaya çatdırıb. Məhz Ümummilli Lider Heydər Əliyevin bu cəsarətli addımı sayəsində dünyanın mütərəqqi qüvvələri də Azərbaycan xalqının məruz qaldığı bu dəhşətli və amansız terroru qətiyyətlə pisləyib.

 

STM-in İctimaiyyətlə əlaqələr bölməsinin müdiri Ramil Zeynallı isə çıxışında 20 Yanvar faciəsində Sumqayıt şəhərindən də ölən və yaralıların olduğunu bildirib. Qeyd edib ki, həmin günü Bakıda olan 2 Sumqayıt sakini şəhid olub, 6 nəfər isə müxtəlif dərəcəli bədən xəsarətləri alıblar.

 

R. Zeynallı 20 Yanvarın ölkəmizin tarixində təkcə faciə deyil, Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanış günü olduğunu vurğulayıb.

 

Tədbir digər çıxışlarla yekunlaşıb.