Qəbələ Rayon Mərkəzi Xəstəxanasında 20 Yanvar faciəsinin 33-cü ildönümü ilə bağlı tədbir keçirilib.

Xəstəxanadan Aztibb.az-a bildirilib ki, öncə 20 Yanvar şəhidlərinin xatirəsi bir dəqiqəlik sükutla yad edilib.

Tədbirdə müəssisənin direktoru Ceyhun Əhmədov çıxış edərək 20 Yanvarın Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olduğunu qeyd edib. Bildirib ki, Azərbaycanın müstəqilliyi, azadlığı uğrunda mübarizəyə qalxan xalqımızın igid övladları 1990-cı il yanvarın 19-dan 20-nə keçən gecə sovet ordusunun ağır hərbi texnikasının, təpədən-dırnağadək silahlanmış amansız hərbçilərin qarşısına əliyalın çıxaraq əsl fədailik göstərdilər.

Ceyhun Əhmədov çıxışında 20 Yanvar şəhidlərinin heç zaman unudulmayacağını, hər zaman yaddaşlarda qalacağını, bu günün təkcə hüzn günü kimi deyil, xalqımızın qəhrəmanlıq tarixi oluğunu qeyd edib.

Daha sonra Qəbələ RMX-nın həkim oftalmoloqu Səbinə Məmmədova çıxış edərək 20 Yanvar hadisəsinin Azərbaycanın tarixində dəhşətli və faciəli səhifə kimi daxil olduğunu deyərək bu faciənin dünya ictimaiyyəti tərəfindən tanınmasında Prezident İlham Əliyevin məqsədyönlü fəaliyyətinin danılmaz olduğunu vurğulayıb.