ABŞ-ın Kaliforniya Universitetinin professoru Duygu Kuzum və komandası insan dərisindən kök hüceyrələrlə beyin orqanoidləri istehsal edərək onları siçanlara köçürməyə müvəffəq olub.
Aztibb.az-ın medimagazin.com.tr-yə istinadla xəbərinə görə, tibb tarixində ilk olan bu transplantasiya nevroloji xəstəliklər və travmatik beyin zədələrinin müalicəsində əhəmiyyətli kəşfdir.
Türk alimin son araşdırmasına qədər beyin orqanoidlərinin zədələnmiş nahiyəyə cərrahi yolla yerləşdirildikdə beynin qalan hissəsi ilə inteqrasiya edib, beynin digər sağlam hissələri kimi fəaliyyət göstərib-göstərməyəcəyi məlum deyildi.
Son tədqiqat ilk dəfə sübut edir ki, siçana implantasiya edilmiş insan beyninin orqanoidləri struktur və funksional olaraq siçan beyninin qalan hissəsi ilə inteqrasiya olunur.
Prof. D.Kuzum, bildirib ki, bu texnologiya ilə zədələnmiş beyin bölgələrinin funksiyaları üçün tibbi protezlər hazırlana bilər:
"Hətta gələcəkdə elektron beyin orqanoidlərini proqramlaşdırmaqla vizual xatirələri qeyd etmək də mümkün ola bilər. Bu, yaddaşa təsir edən bir çox nevroloji xəstəliklərin müalicəsi üçün ümid doğuracaq".