Aztibb.az xəbər verir ki, Sumqayıt Tibb Mərkəzinin 1 nömrəli Şəhər Xəstəxanasının həkim-infeksionisti Səkinə Həsənlinin sözlərinə görə, influenza viruslar tərəfindən törədilən kəskin respirator infeksiyadır: “Xəstəlik özünü yüksək hərarət, əsasən quru öskürək, baş, oynaq və əzələ ağrısı, zökəm, boğaz agrısi kimi əlamətlərlə biruzə verir. Bir çox insanlarda xəstəlik 1 həftə ərzində öz-özünə sağalır”.

 

S.Həsənli bəzi risk qruplarında məsələn, hamilə qadınlarda, 5 yaşa qədər uşaqlarda, yaşlı şəxslərdə, HİV daşıyıcılarında xəstəliyin ağır gedişli ola biləcəyini istisna etmir: “Xəstəlik hava-damcı yolu ilə yayıldığı üçün əhalinin sıx toplaşdığı yerlərdə, təhsil müəssisələrində daha tez yayılır.

 

Həkim-infeksionist kəskin respirator infeksiyalardan qorunmaq yollarını da göstərib: “İnfeksiyanın yayılmasının qarşısını almaq üçün şəxsi gigiyena qaydalarına riayət etmək, əlləri mütəmadi yumaq, tibbi maskadan istifadə etmək lazımdır. Xəstə şəxslər özlərini mümkün qədər izolyasiya etməlidirlər. Profilaktikada ən effektiv üsul vaksinasiyadır. İmmunitet davamlı olmadığı üçün vaksinasiya hər il aparılmalıdır. Xəstəliyin fəsadlaşmaması üçün yuxarıda sadalanan risk qruplarının vaksinasiyası tövsiyə olunur”.