Ankara Etlik Şəhər Xəstəxanası Qadın Xəstəlikləri Onkoloji Klinikasının dosenti Vakkas Qorxmaz qadınlarda ən çox rast gəlinən xərçəng növlərindən biri olan uşaqlıq boynu xərçənginin dünyada 4-cü, Türkiyədə isə 9-cu yerdə olduğunu bildirib. Qeyd edib ki, xəstəliklə bağlı ən mühüm yenilik HPV peyvəndinin 9-cu versiyasının yanvar ayından etibarən Türkiyədə bazara çıxarılmasıdır.

Bu barədə Aztibb.az medimagazin.com.tr-yə istinadla məlumat verir.

Vakkaş Qorxmaz yanvar ayının “Uşaqlıq Boynu Xərçəngi ilə Mübarizə Ayı” olduğunu xatırladaraq xəstəliyin əlamətlərinin anormal vaginal qanaxma olduğunu deyib. O, bütün xərçənglərdə olduğu kimi diaqnozun mərhələsinə görə müalicə prosesinin dəyişdiyini söyləyib.

Xərçəng növünün cinsi yolla keçən HPV virusundan qaynaqlandığını qeyd edən V.Qorxmaz bildirib ki, bu xəstəlikdən qorunmaq üçün nizamlı cinsi həyat vacibdir. Eyni zamanda, HPV virusu insanda öz-özünə təmizlənə bilən virusdur, qadınların bədənində qaldıqda isə xərçəngə səbəb ola bilir.

O, dünyada uşaqlıq boynu xərçənginə səbəb olan HPV virusuna qarşı peyvəndin olduğunu deyərək, Türkiyədə də bu aydan etibarən HPV peyvəndinin 9-cu variantının satışa çıxarıldığını diqqətə çatdırıb: "Peyvənd olunmaq istəyən pasiyentlərimiz bu peyvəndi asanlıqla ala bilərlər. HPV peyvəndi, tərkibindəki növlərə qarşı qoruyucu təsirə malik olduğu tam sübut edilmiş bir peyvənddir. Bu peyvənd 9 yaşından etibarən oğlan və qızlara vurula bilər. 15 yaşa qədər iki dozada tətbiq oluna bilər. Peyvəndin 15 yaşından sonra xüsusilə immun sistemi zəif olan qadınlara 3 dozada tətbiq edilməsini tövsiyə edirik. 2 doza tətbiq olunacaqsa, aralarında ən azı 6 aylıq bir müddət buraxmaq vacibdir".