“Xolesterin yağa bənzər maddə olub, qaraciyər hüceyrələri tərəfindən az miqdarda hazırlanır, lakin bu az miqdar bütün hüceyrə qişalarının yaradılmasına, öd turşuların, hormonların və D vitamininin əmələ gəlməsinə bəs edir".

 

Aztibb.az xəbər verir ki, bu barədə Xətai Tibb Mərkəzinin uzman terapevti Çinarə Səfərova məlumat verib.

 

Uzman həkim qeyd edib ki, xolesterin insan orqanizminin normal fəaliyyəti üçün ən vacib olan maddələrdəndir. Lakin orqanizmdə normadan artıq miqdarda olduqda xolesterin insanın qatı düşməninə çevrilir. Artıq xolesterin damarlarda yığılmağa balşayır ki, bu da damarların daralmasına, zəifləməsinə, tıxanmasına gətirib çıxardır. Bütün bunlar isə, öz növbəsində, ürək-damar sistemi xəstəliklərinin, infarkt və insultun əsas səbəbləridir.

 

Təəssüf ki, xolesterinin orqanizmdə normadan artıq olması bir çox hallarda özünü heç bir simptomla büruzə vermir və təsadüf nəticəsində aşkar olunur. Lakin bəzi simptomlar var ki, onlar xolesterinin yüksəlməsinə işarə edə bilər.

 

— Ürək nahiyyəsində ağrılar, sıxılma hissi;

— Hətta yüngül fiziki iş və ya qısamüddətli gəzintidən sonra ayaqlarda ağrılar və ağırlıq hissi;

— Göz qapaqlarında və gözlərin altında kiçik sarı piy şişlərinin əmələ gəlməsi (ən xarakterli simptom);

— Təzyiqin tez-tez qalxıb-düşməsi;

— Zəiflik və yorğunluq, hətta səhər yuxudan oyandıqdan sonra;

— Saçların tez ağarması;

— Baş ağrıları, yaddaşın və diqqətin pozulması.

 

"Əgər sizdə bu simptomların bir hissəsi varsa, mütləq qanda xolesterinin səviyyəsini yoxlayın”, - deyə Çinarə Səfərova bildirib.