Varikoz xəstəliyi getdikcə "cavanlaşır”. İndi varikoz xəstələrinin demək olar ki, yarısı 30-35 yaşlı insanlardır. Yaşından, növündən və şikayətlərindən asılı olmayaraq varikozun müalicəsi mütləqdir.

Aztibb.az xəbər verir ki, bu barədə Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.

Onun sözlərinə görə, kapilyarların müalicəsi daha çox estetik xarakter daşıyır və insanların istəyinə bağlı olur. Damarların genişlənməsi isə əksinə, müalicə olunmadıqda bir sıra fəsadlara yol aça bilir.

C.Gülmalıyev bildirib ki, damar çatışmazlığının ağırlaşmış mərhələlərində ayaqlarda venoz yaralar yarana bilər. İnfeksiyalı yaraların müalicəsi gecikərsə, və yaxud müalicə edilməzsə, xəstələrdə proses irəliləyər. Nəticədə ayaq müxtəlif hissəsindən kəsilə bilər.

"Həmçinin zədələnmiş damar, trofik yaralar, ağciyər arteriyasının tromboembolizmi və s. fəsadları vardır. Bu fəsadların müalicə edilməsi son dərəcə çətindir. Bu baxımdan, aşağı ətraf varikoz genişlənmiş damarlarının müalicəsi təxirə salınmamalıdır.

Varikozdan xilas olmaq üçün, erkən diaqnozun mühüm əhəmiyyəti vardır. Varikozun müalicəsini gecikdirməyin!", -deyə uzman həkim əlavə edib.