Qadınların əksəriyyəti o cümlədən yetkin yaşlı qadınlar doğuş və doğuşdan sonrakı dövrü narahat keçirir. Bu səbəbdən onlara qarşı daha diqqətli olmaq məsləhətdir.

 

Aztibb.az xəbər verir ki, Mingəçevir Şəhər Mərkəzi Xəstəxanasının Poliklinika şöbəsinin mama-ginekoloqu Esmira Hüseynova hamilə xanımlara qarşı daha diqqətli olmağı tövsiyə edir.

 

"Sözsüz ki, hamiləlik dövründə qadın orqanizmində baş verən kəskin hormonal dəyişiklik onun emosional durumuna da təsir edir. Mayalanma prosesi baş tutduqdan sonrakı ilk həftələrdə progesteron hormonu aktivləşir. İlk aylarda onun miqdarı bir neçə dəfə artır – dölün normal formalaşması və inkişafı üçün bu vacibdir. Amma bu gözlənilməz dəyişikliklə üzləşən qadın orqanizmi "əsl şok" keçirir", -  deyə həkim bildirib. 

 

E.Hüseynovanın sözlərinə görə, bu səbəbdən, hamiləliyin birinci üçaylığı (trimestri) emosional cəhətdən ən narahat dövrdür. Qadınların özü də, daha çox yaxın qohumları onların əsəbi olduğunu, ağlağanlığını, tez yorulmasını, iştahanın dəyişməsini, ürək bulanmanı və gün ərzində yuxulu olduğunu qeyd edir. Ona görə də qadınlara məxsus həmin vacib və özəl aylarda onlara dəstək olmaq lazımdır.