Ümumdünya Səhiyyə Təşkilatının məlumatına əsasən, hər il dünyada 600 milyon nəfər qida zəhərlənməsinə məruz qalır. Buna səbəb müxtəlif növ bakteriya, virus, parazit və yaxud kimyəvi maddələrlə çirklənmiş qida məhsullarının istehlakıdır. Xüsusilə turşu bağlayarkən gigiyena qaydalarına əməl edilməməsi və müxtəlif kimyəvi preparatlardan istifadə zəhərlənmələrə aparıb çıxarır.

Aztibb.az AZƏRTAC-a istinadla xəbər verir ki, qida mütəxəssisi Məhsəti Hüseynovanın dediyinə görə, turşu qoyarkən yalnız mövsümü meyvə və tərəvəzlərdən istifadə etmək lazımdır: “Mövsümü olmayan və yaxud yetişdirilməsində müəyyən kimyəvi dərmanlardan istifadə edilən tərəvəzlərdən turşu qoyulursa, təbii ki, müəyyən vaxtdan sonra onların arasında reaksiya gedir və zəhərlənməyə aparıb çıxarır. Bəzən hər hansı xarab olmuş meyvə və ya tərəvəzin turşuya qoyulması digərlərini də xarab edir və bu da zəhərlənmə ilə nəticələnər. Xanımların turşu qoyarkən kor-koranə şəkildə aspirin, sitramon və s. kimi dərmanlardan istifadə etməsi həmin qida məhsulunun tərkibini dəyişir və zəhərlənməyə səbəb olur. Bəzən isə turşuya əlavə edilən sirkənin miqdarını aşırı dərəcədə edirlər. Bu isə onunla qidalanan hər kəsdə fərqli reaksiya verə bilər”.

Turşu hazırlanıldıqdan sonra Günəş şüalarından uzaq olan normal otaq temperaturunda saxlanılmalıdır. Onu qəbul etməzdən əvvəl həm rənginə, dadına, həm də görünüşünə diqqət yetirmək lazımdır. “Turşu qoymaq üçün mütləq şüşə qablardan istifadə edilməlidir. Onları bağlayan qapaqlara xüsusilə diqqət yetirilməlidir. Həmin qapaqlar təzə, birdəfəlik istifadə üçün nəzərdə tutulmalıdır. Hazırlanmış turşular sərin və qaranlıq yerdə saxlanılmalı, mütəmadi olaraq yoxlanılmalıdır. Əgər qapaq şişibsə və ya turşu məhsulunun suyu bulanıqdırsa, dibində ağ çöküntü varsa, bunlar zəhərlənməyə səbəb olan əsas əlamətlərdən hesab olunur”,- deyə mütəxəssis bildirib.

Qida zəhərlənməsi 12-48 saat ərzində özünü büruzə verir. Zəhərlənmənin ilkin əlamətləri ürəkbulanma, qusma və ishaldır. Bu halda vaxt itirmədən həkimə müraciət etmək lazımdır.