Allergen (məsələn, tozcuq) orqanizmə daxil olduqda, allergik immun reaksiya yaranır. İltihabi maddələr (histamin, leykotrien, interleykin, triptaza, prostaqlandin, xemokinlər) sərbəst buraxılır, bu da allergik reaksiyaya səbəb olur və zökəm, asqırma tutmaları, burun tutulması, qulaqlarda tutqunluq, gözlərin yaşarması, burun, ağız, boğaz, qulaq və gözlərdə qaşınma, burun qanamaları, baş ağrısı, süstlük, gözaltı kölgələr və s. bu kimi simptomlar meydana gəlir.

 

Aztibb.az 2 nömrəli Bakı Baza Tibb Kollecinə istinadla xəbər verir ki, allergen rolunu bitki tozcuqları, ev tozu gənəsi, əskinas tozu, heyvanların, quşların tükləri və ya ifrazatları (məsələn: it, pişik, tutuquşu), balıq yemi, kimyəvi maddələr, yuyucu vasitələr, boyalar, keyfiyyətsiz ətirlər və s. oynayır.

 

Bəzən qida allergenləri də allergik rinitə səbəb ola bilər. Allergen uzaqlaşdırılmasa və ya müalicə olunmazsa, proses irəliləyərək burun polipozu, polipoz sinusit, allergik bronxit və astmaya səbəb ola bilər.