Əgər gənc yaşlarından xəstənin mədəsində yara, xora, qastrit, polip varsa, o, düzgün müalicə almalı, 1 ildən bir yoxlanılmalı və düzgün qidalanmalıdır.

Aztibb.az xəbər verir ki, bu barədə qastroenteroloq-endoskopist Rəfael Həsənov məlumat verib.

Həkimin sözlərinə görə, 1-2-3 sm-ə qədər şişlər heç bir kəskin əlamət vermir. Sadəcə həzm pozuntusu, mədədə ağırılıq, sanki nəsə qalmış hissi və iştahsızlıq ola bilər.

Qastroenteroloq qeyd edib ki, şiş böyudükcə mədə divarı rigidləşir, yəni elastikliyini itirir, bərkiyir və qida qəbul etdikdə dartılmır, uzanmır. Əgər yeməkdən əvvəl və sonra, axşam və səhər acqarına mədənizin yığılmadığını, sanki elə bərkimiş kimi qalmış, əlinizin altında bərk, dolu hiss etsəniz bu, artıq şişin içəridən böyüdüyünü göstərir.

R.Həsənov mədə xərçənginin əlamətlərini də sadalayıb:

Qan azlığı;
Çəkinin səbəbsiz itirilməsi;
Əvvəllər sevdiyiniz, dadından doymadığınız yeməklərə ikrah hissi;
Tez doymaq və mədənin dolması hissi;

Mədə yuxarısında şiş - udmada, udqunmada çətinlik, sanki qida güclə keçir;

Epiqastral nahiyədə ağrı, bəzən ağrı kürəyə vurur;
Fontan qusma;
Qanama, səhərlər qida borusundan qanlı axıntı, qanla qarışıq mədə şirəsinin gəlməsi və s.

"Aşağı hissədə olan şiş yeməyin bağırsağa ötürülməsinin qarşısını aldıqda, xəstədə ürəkbulanma və yediyinin bir hissəsini qaytarma baş verir. Əgər bu proses sizdə ayda 4-5 dəfə olursa, təcili həkimə müraciət etməlisiniz", - deyə R.Həsənov bildirib.