Dünyada ilk dəfə olaraq qalxanabənzər vəzdən alınan kök hüceyrələr başqa bir orqanın, paratiroid vəzinin hüceyrələrinə çevrilib. Beləliklə, orqan çatışmazlığının müalicəsində yeni bir səhifə açılıb.
Bu barədə Aztibb.az medimagazin.com.tr-yə istinadla xəbər verir.
Yeditepe Universitetinin Koşuyolu Xəstəxanasının cərrah-endokrinoloqu, prof. Erhan Ayşanın rəhbərliyi ilə multidissiplinar tədqiqat qrupu tərəfindən aparılan araşdırmada sağlam qalxanabənzər vəzdən əldə edilən kök hüceyrələr müxtəlif laboratoriya proseslərindən keçərək tamamilə fərqli bir orqan olan paratiroid vəzi hüceyrələrinə çevrilib.
Bu mühüm araşdırma beynəlxalq miqyasda nüfuzlu elmi jurnalda nəşr olunub və tibbi ədəbiyyata daxil olub.
Paratiroidin bədənimizdəki kalsium balansını saxlayan yeganə orqan olduğunu deyən prof. Erhan Ayşan qalxanabənzər vəzi orqanını paratiroid orqanına çevirdiklərini bildirib. Qeyd edib ki, bu, həm donor tapmaq probleminin həlli, həm də transplantasiya müvəffəqiyyət nisbətinin artırılması baxımından önəmli bir araşdırmadır:
"Eyni şəxsin qalxanabənzər vəzindən alınan kök hüceyrələrlə ediləcək nəqllərdə transplantasiya üçün donor tapmağa ehtiyac qalmayacaq və həmin şəxsin öz toxuması istifadə edildiyi üçün transplantasiyaların müvəffəqiyyət nisbəti artacaq, toxuma uyğunluğu problemi olmayacaq".