Bayramda süfrəyə müxtəlif cür təamlar düzülsə də, bu o demək deyil ki, bütün qida və şirniyyatlar qəbul edilməlidir. Bu dönəmlərdə, xüsusilə şəkərli diabet xəstələrinin qidalanmalarına fikir vermələri, şəkərli qidalardan uzaq durmaları tövsiyə olunur.

Bu barədə Mingəçevir ŞMX-nın 1 saylı ASM-in həkim-terapevti Məlahət Mustafayeva öz məsləhətlərini verib:

Həkim bildirib ki, vətəndaşlara hər bir qidanı öz qədərində qəbul etmələri məsləhət görülür. Bununla yanaşı, yüksək təzyiqdən əziyyət çəkənlər çox yağlı, ağır yeməklərdən uzaq durmalıdırlar.

"Gecə saatlarına qədər qida qəbul etmək düzgün deyil. Bayram günlərini nəzərə alaraq, axşam saat 7-8-dən sonra qida qəbul etməmək tövsiyə olunur. Yaxşı olar ki, qida qəbulu zamanı müxtəlif yeməkləri eyni vaxtda qəbul edilməsin. Fərqli qidalar arasında ən azı 30-40 dəqiqə arasında fasilə olmalıdır. Həmçinin qida allergiyası olan insanlar un məhsullarından mümkün qədər uzaq durmalıdırlar”, - deyə M.Mustafayeva qeyd edib.