Diabetik koma qanda tam və nisbi insulin çatışmazlığı nəticəsində şəkərin miqdarının normadan qat-qat artıq olması fonunda meydana çıxan huşsuzluq halıdır. Həyat üçün təhlükəli olan bu hal təcili stasionar müalicə tələb edir.

Bu barədə Aztibb.az-a Xətai Tibb Mərkəzinin uzman terapevti Çinarə Səfərova məlumat verib.

Həkim bildirib ki, 25% dabetik koma halı gizli sürən və ya şəkərli diabet aşkarlanmamış şəxslərdə rast gəlinir.

Çinarə Səfərova diabetik komanın əlamətlərini də açıqlayıb. Onun sözlərinə görə, xəstədə tənəffüsün aseton qoxulu (çürük alma ya dırnaq boyağı qoxusu) olması, polidipsiya hədsiz susuzluq hissi, hədsiz su qəbulu, hədsiz sidik ifrazı, yorğunluq, halsızlıq, ürəkbulanma, qusma, qarın nahiyyəsində ağrılar, təzyiqin düşməsi, süstlük kimi əlamətlər diabetik komanın inkişafından xəbər verir.