Hepatit B və C qaraciyərdə fəsadlara və ağırlaşmalara səbəb olan viruslardır. Böyrək nəqli sonrası immun sistemini basqılayan dərmanlar orqanizmin hepatit virusuna qarşı apardığı müqavimətə mənfi təsir edə bilər. Buna görə də çox hallarda qanında hədddindən artıq virus olan və qaraciyərində ciddi ağırlaşmaları olan pasientlərə, böyrək nəqli tətbiq edilmir, sadəcə dializ ilə həyatlarına davam edirlər.
Aztibb.az xəbər verir ki, bu fikirləri nefroloq Barat Yusubov böyrək nəqli ilə bağlı məlumat verərkən deyib.
Həkim əlavə edib ki, bir xəstədə Hepatit B vəya C varsa və aparılan müayinələrin nəticələrinə görə qaraciyər heç bir xəsarət almayıbsa, o zaman bu xəstəyə böyrək nəqli tətbiq oluna bilər.
"Böyrək nəqli bu xəstələrdə dializ müalicəsi ilə müqayisədə, daha sağlam və uzunömürlü həyata səbəb ola bilər", - deyə həkim qeyd edib.