Aralıq dənizi ölkələrində rast gəlinən genetik xəstəlik olan Ailəvi Aralıq dənizi qızdırmasının sürətli diaqnozuna diqqət çəkən türk alimlər yarım saat ərzində nəticə verən yeni texnologiya hazırlayıblar.
Aztibb.az medimagazin.com.tr-yə istinadla xəbər verir ki, Dokuz Eylül Universiteti (DEÜ) Tibb fakültəsinin Uşaq revmatologiyası üzrə professoru Erbil Ünsal və İzmir Biotibb və Genom Mərkəzində tədqiqat qrupunun rəhbəri Arif Engin Çetinin TÜBİTAK-ın dəstəyi ilə həyata keçirildiyi layihə uğurla yekunlaşıb.
Türkiyəli alimlər təkrarlanan qızdırma, qarın ağrısı, sinə ağrısı və oynaq ağrıları səbəbiylə xəstələrin həyat keyfiyyətini aşağı salan, "FMF" (Familial Mediterranean Fever) olaraq da bilinən Ailəvi Aralıq dənizi qızdırmasını qan nümunələrindən optik texnologiyalarla tez aşkar edə bilən cihaz və sistem hazırlayıblar.
Prof. Erbil Ünsal Ailəvi Aralıq dənizi qızdırmasını genetik müayinələrlə araşdıraraq xəstəliyin əsasını təşkil edən zülalı təsbit edə bildiklərini deyib. O, bu texnologiya sayəsində xəstələrin dərman müalicəsinə daha tez başlaya biləcəklərini söyləyib.
