Xroniki xəstəlik dedikdə 3 aydan çox müddətdə davam edən xəstəlik nəzərdə tutulur. Belə xəstəliklərin qarşısı peyvəndlə alınmır, öz-özünə və dərmanla tam sağalmır. Bu, dünyada öndə gələn ölüm səbəblərindən biridir.

 

Aztibb.az xəbər verir ki, bu barədə həkim-radioloq Şəbnəm Topbaştekin məlumat verib.

 

Radioloq qeyd edib ki, bu qrup xəstəliklər insanların gündəlik yaşama tərzinə təsir edir, sosial həyatlarında dəyişikliyə səbəb olur. Hətta bu cür xəstəliklə mübarizə apara bilməyən bəzi insanların psixoloji vəziyyəti də pisləşir: "Bəzən bir xəstəlik ya vəziyyət xroniki olsa belə, adlandırılmasında “xroniki” sözü istifadə olunmur. Məsələn epilepsiya, astma, artrit, xərçəng, kistoz-fibroz, diabet, amiotrofik lateral skleroz, iflic, piylənmə, osteoporoz və s.

 

Ən çox rast gəlinən xroniki xəstəliklərə ürək-damar xəstəlikləri (yüksək arterial təzyiq, ürək çatışmazlığı, aritmiyalar və b.) , sümük oynaq xəstəlikləri (osteoartrit , artrit , və s. ), tənəffüs yolları xəstəliyi (bronxial astma, bronxit və s.), diabet xəstəliyi (1-ci və 2-ci tip), qalxanabənzər vəz xəstəlikləri (hipotiroidizm, hipertiroidizm və b.), nevroloji xəstəliklər (Parkinson, Alzeimer və b.), allergiyalar, xərçəng xəstəliyi və bəzi həzm sistemi xəstəlikləridir".

 

Şəbnəm Topbaştekin bildirib ki, xroniki xəstəliklərin yaranma səbəbləri müxtəlifdir. Bunlardan genetik səbəbi, diş və ətraf mühit faktorlarını nümunə göstərmək olar. Eyni zamanda, insanın gündəlik həyat tərzi və vərdişləri də buna təsir edir. Bunlara siqaret, normadan artıq alkoqollu içki, düzgün qidalanmamaq, artıq çəki və s. aiddir.

 

Onun sözlərinə görə, xəstəliyin erkən diaqnozu və müalicəsinin sonrakı gedişatına böyük təsiri vardır. Bu qrup xəstəliyin müalicəsi xəstəyə, xəstəliyə və xəstəliyin gedişatına görə dəyişir. Bəzilərinin müalicəsi dərmanla aparıldığı halda digərinə psixoterapiya tətbiq olunur.