Türkiyə Sağlamlıq Qurumları (TÜSEB) Başkanlığı tərəfindən sinir və əzələlərə təsir edən xəstəliklərin diaqnozunda istifadə edilmək üçün yerli elektromiyoqrafiya (EMG) cihazı hazırlanacaq.
Aztibb.az bu barədə medimagazin.com.tr-yə istinadla xəbər verir.
TÜSEB-in Süni İntellekt Tətbiqləri İnstitutunun (TÜYZE) rəhbəri, prof. Songül Varlı süni intellekt texnologiyasından istifadə edərək beyin və əzələ siqnallarının və müxtəlif robot mexanizmlərin idarə edilməsi ilə bağlı aparılan işlər haqqında məlumat verib.
Süni intellektdən istifadə edilən robotik proseslərin tibbin bir çox sahələrində istifadə edildiyini deyən S.Varlı xüsusilə fiziki müalicə və reabilitasiya sahəsi üçün hazırlanmış robot sistemlərin bu texnologiyalar arasında xüsusi yer tutduğunu bildirib. O, institutda fəaliyyət göstərən Robototexnika və Süni İntellekt laboratoriyasında beyin və əzələ siqnalları ilə müxtəlif robot mexanizmlərin idarə edilməsi üzərində çalışdıqlarını söyləyib: "Robotexnika və Süni İntellekt laboratoriyamızda bioloji siqnalların təhlili və bu siqnalların robotlarda istifadəsi üçün yeni metodların işlənib hazırlanması və sınaqlarını həyata keçiririk. Hazırlayacağımız EMG cihazını da bu cür tədqiqatlarda istifadə etməyi planlaşdırırıq. Layihələrimizdə müxtəlif elm sahələrinin mütəxəssisləri ilə işləyirik”.
O, 3 aydır bu cihaz üzərində çalışdıqlarını və EMG-nin sinirlərdə meydana gələn disfunksiyaları müəyyən etdiyini, sinir və əzələləri təsir edən xəstəliklərə diaqnoz qoya bildiyini qeyd edib.
