Dekabrın 21-də İcbari Tibbi Sığorta üzrə Dövlət Agentliyinin Talassemiya Mərkəzində Media və QHT nümayəndələri üçün təlim təşkil olunub.

Aztibb.az xəbər verir ki, təlimin keçirilməsində əsas məqsəd vətəndaş cəmiyyəti və media nümayəndələrinin icbari tibbi sığorta sisteminin işləmə mexanizmi haqqında məlumatlılıq səviyyəsini artırmaq, onlarla əməkdaşlıq imkanlarını genişləndirmək və gücləndirməkdir.

Tədbirdə təqdimatla çıxış edən Agentliyin Marketinq və ictimaiyyətlə əlaqələr departamentinin rəhbəri Aynurə Əhmədova öncə icbari tibbi sığorta haqqında və bu sahədə yeniliklərlə bağlı ümumi məlumat verib. Qeyd edib ki, əhalinin icbari tibbi sığorta barədə məlumatlandırılmasında qeyri-hökumət təşkilatları və media mənsublarının rolu böyük əhəmiyyət daşıyır. Bu səbəbdən media mənsublarına və bu sahədə maarifləndirmə tədbirləri təşkil edən vətəndaş cəmiyyətinə icbari tibbi sığorta sisteminin qaydaları barədə dolğun məlumatlar vermək zəruridir.

Təlimdə iştirakçılar icbari tibbi sığorta sistemi ilə bağlı bir sıra istiqamətlər üzrə də geniş  məlumatlandırılıb.

Xüsusilə icbari tibbi sığorta çərçivəsində tibbi xidmətlərdən istifadə qaydası, icbari tibbi sığorta haqları, Xidmətlər Zərfində təminat verilən tibbi xidmətlər, eləcə də TƏBİB-in tabeliyindəki dövlət tibb müəssisələri barədə məlumat, Agentliyin müqavilə bağladığı özəl tibb müəssisələrinin siyahısı, bu müəssisələrdə icbari tibbi sığortadan istifadə qaydası və s. izah edilib. 

Sonda iştirakçıların mövzu üzrə sualları ekspert tərəfindən cavablandırılıb. İştirakçılar icbari tibbi sığorta sistemi barədə məlumatlılıq səviyyəsinin ölçülməsi məqsədilə yazılı sorğuda da iştirak ediblər.