Böyük Britaniyada yerləşən Bristol Universitetinin professoru Massimo Caputo və komandası anadangəlmə ürək xəstəliyi olan 2 yaşlı Finley adlı uşağı ürəyinə yeritdikləri kök hüceyrə ilə sağaldıblar. Bu, dünyada bir ilkdir.

Aztibb.az-ın medimagazin.com.tr-yə istinadla verdiyi xəbərə görə, Finley ağciyərləri və bədəni qanla təmin edən iki əsas arteriyanın yanlış mövqelərdə olduğu "böyük arteriyaların transpozisiyası" adlı anadangəlmə ürək qüsuru ilə doğulub. Cəmi 4 günlük ikən açıq ürək əməliyyatı keçirən uşağın sağ qalma şansının az olduğunu bildirən həkimlər onu əməliyyatdan sonra ürəyinin və ağciyərlərinin funksiyasını üzərinə götürən aparata qoşublar. Əməliyyatdan sonra ürəyinin əksər funksiyalarını itirən Finley həftələrlə dərman müalicəsi alıb.

Professor M.Caputo və komandası körpə üçün qeyri-adi bir prosedur həyata keçirərək, onun ürəyinə birbaşa kök hüceyrənin xüsusi növünü yeridiblər. Əməliyyatın məqsədi kök hüceyrə inyeksiyası ilə Finleyin ürəyinin sol tərəfinə qan axını artırmaq üçün zədələnmiş qan damarlarının inkişafını stimullaşdırmaq olub.

Əməliyyatdan sonra tədricən sağalmağa başlayan Finleyin səhhətinin yaxşı olduğu bildirilib.