Tibbi Ərazi Bölmələrini İdarəetmə Birliyinin (TƏBİB) dəstəyi, Elmi-Tədqiqat Travmatologiya və Ortopediya İnstitutunun (ETTOİ) təşkilatçılığı ilə İkinci Qarabağ müharibəsinə həsr olunan Azərbaycan Travmatoloq və Ortopedlərinin IV Qurultayı keçirilib.
TƏBİB-dən Aztibb.az-a bildirilib ki, tədbirdə TƏBİB-in İcraçı direktorunun müavinləri - Araz Nəsirov və Anar İsrafilov, İcbari Tibbi Sığorta üzrə Dövlət Agentliyinin (Agentlik) tibbi planlama departamentinin rəhbəri Hikmət İbrahimli, millət vəkili Soltan Məmmədov, ETTOİ-nin direktoru Elviz Qasımov, ETTOİ-nin direktor müavini Fərhad Verdiyev, həkim-travmatoloq-ortopedlər və b. iştirak ediblər.
Tədbirdə çıxış edən H.İbrahimli Azərbaycan travmatoloq-ortopedlərinin 44 günlük müharibə zamanı xəsarət alan əsgər və zabitlərimiz üzərində həyati vacib rekonstruktiv-bərpaedici əməliyyatlar apardıqlarını bildirib. Agentlik rəsmisi, həmçinin icbari tibbi sığorta çərçivəsində göstərilən travmatoloji-ortopedik tibbi xidmətlər barədə məlumat verib və 2020-ci ildən bu günə qədər icbari tibbi sığorta çərçivəsində 1600-ə yaxın endoprotezləşdirmə əməliyyatı icra olunduğunu qeyd edib.
Qurultayda II Qarabağ müharibəsi zamanı travmatoloji xidmətin təşkili, odlu silah yaralanmaları zamanı sümük və yumşaq toxumalarda cərrahi müdaxilələr, qazi və yaralananların tibbi, psixo-sosial reabilitasiyası, travmatologiya və ortopediyanın digər aktual problemlərini əhatə edən 8 panel təqdim olunub.
Azərbaycan və Türkiyənin yüksəkixtisaslı mütəxəssisləri tərəfindən təqdim olunacaq məruzələrdə ən son tibbi məlumatlar əks olunub. Konqres sual-cavab sessiyaları və panel müzakirələri ilə davam etdirilib.
Qurultayda ilk dəfə olaraq “Azərbaycan Travmatoloq və Ortopedlərin dostu” fəxri adları türkiyəli həkimlərə təqdim edilib. Həm Qarabağ müharibəsində, həm də yerli həkimlərin uzmanlıq ixtisaslarının təkmilləşdirilməsində qardaş ölkə həmkarlarının əvəzsiz rolu olduğu qeyd edilib.
Sonda 44 günlük Vətən Müharibəsində iştirak edən travmatoloq-ortopedlər təltif edilib.
