New Jersey Rotgers Robert Wood Jonhson tibb müəssisəsində aparılmış böyük bir retrospektiv araşdırmada bariatrik cərrahiyyə (mədə kiçiltmə) əməliyyatı icra olunmuş xəstələrlə, ciddi obez (piylənmədən, artıq çəkidən əziyyət çəkən) və alkoqolsuz yağlanmış qaraciyər xəstəliyi olan pasiyentlərin nəticələri müqayisə olunub. 2007-2017-ci illər ərzində 87000 xəstədən ibarət 96 aylıq araşdırmada bariatrik cərrahiyyə icra olunmuş xəstələrin, qeyri-cərrahi (dərman və s.) müalicə həyata keçirlimiş xəstələrlə müqayisəsində ürək-damar xəstəlikləri riskinin 49% azaldığı müəyyən edilib.

 

Aztibb.az xəbər verir ki, bu barədə həkim-endokrinoloq Fərhad Burzu məlumat verib.

 

Onun sözlərinə görə, araşdırma aparılan xəstələrin ortalama yaş həddi 45 olub. Onların 56%-də yüksək arterial təzyiq, 45%-də lipid-mübadilə pozğunluğu, 35%-də isə yuxu apnesi sindromuna (yuxuda nəfəs tıxanıqlığına bağlı xoruldama, boğulma) rast gəlinib. Cərrahi xəstələr qeyri-cərrahi xəstələrdən daha gənc olub (43 yaş) və xəstələr arasında qadınlar üstünlük təşkil edib.

 

Fərhad Burzu bildirib ki, 96 aylıq araşdırma müddətində ürək-damar xəstəliklərinin rastgəlmə tezliyi, qeyri-cərrahi və cərrahi qruplar arasında müqayisəli şəkildə analiz olunub və aşağıdakı nəticələr əldə edilib:

 

Qeyri-cərrahi Cərrahi

24 ay: 12.8% 5%

48 ay: 21.1% 10.4%

72 ay: 28.2% 15.6%

96 ay: 35.6% 21.6%

 

"Bununla yanaşı, bariatrik cərrahiyə zamanı miokard infarkt riskinin 2.6%-dən 1.7%-ə, ürək çatışmazlığının 11.5%-dən 4.2%-ə, işemik atak riskinin 3.4%-dən 3%-ə qədər azaldığı müşahidə olunub.

Yuxarıda qeyd olunmuş göstəriciləri nəzərə alaraq bariatrik cərrahiyənin uyğun pasiyentlərdə üstünlükləri inkarolunmazdır. Doğru seçilmiş xəstə qruplarında həyata keçirilməsi tövsiyyə oluna bilər", - deyə endokrinoloq  qeyd edib.