Bu barədə Aztibb.az-a Mərkəzi Gömrük Hospitalından məlumat verilib.

 

Nüfuzlu tədbirə 50-yə yaxın ölkəni və beynəlxalq təşkilatları təmsil edən 2500-dən çox əyani iştirakçı qoşulub.

 

Konqresin açılış mərasimində Türkiyə Respublikasının səhiyyə Naziri Fahrettin Koca çıxış edib. Konqresin sədri, Türkiyə Respublikası Səhiyyə Nazirinin müavini prof.  Sabahattin Aydın iştirakçıları tədbirin zəngin elmi proqramı ilə tanış edərək, konqresin Türk Dünyasında və digər ölkələrdə Beynəlxalq Səhiyyə Keyfiyyət və Performans Sisteminin təkmilləşdirilməsinə təkan verəcəyinə əminliyini ifadə edib.

 

Konqresdə səhiyyə xidmətlərində keyfiyyətin qiymətləndirilməsi və onun artırılması, akkreditasiya və beynəlxalq standartların tətbiqi, dəyişən dünyada səhiyyə keyfiyyətinin rolu, xəstələrin və tibb işçilərinin təhlükəsizliyinin təmin edilməsi əsasında effektiv, səmərəli xidmət göstərilməsinin davamlılığı, tibb müəssisələrində fəaliyyətin monitorinqi və performansın artırılması, risklərin idarə edilməsi, səhiyyədə innovativ yanaşmaların, sübut-əsaslı təcrübələrin tətbiq edilməsi və digər məsələlər müzakirə olunub.

 

“Səhiyyənin gələcəyini keyfiyyətlə dizayn edək” mövzusu üzrə keçirilmiş konqresdə ictimai səhiyyənin gələcəyinə diqqət yetirilib, tibbdə performans və keyfiyyətlə bağlı mövcud inkişaf istiqamətləri müzakirə olunub, beynəlxalq təcrübələr və innovativ yanaşmalar paylaşılıb, səhiyyə işçiləri arasında ünsiyyət və əməkdaşlığın artırılması üçün platforma yaradılıb.

 

Tədbirdə Türkiyə Respublikası və digər ölkələri təmsil edən elm adamları, aparıcı səhiyyə menecerləri, dövlət və özəl tibb qurumlarının rəhbərləri səhiyyədə performans və keyfiyyətin artırılması, beynəlxalq akkreditasiya üzrə öz təcrübələrini bölüşüblər. Eyni zamanda, konqres çərçivəsində dövlət, özəl və universitet səhiyyə müəssisələrinin keyfiyyət, performans, xəstə xidmətləri və işçilərin təhlükəsizliyi sahələrində fəaliyyətlərinin müzakirəsi və təhlili aparılıb.

 

Konqres zamanı təqdim edilən və müasir tibb xidmətlərinin müxtəlif sahələrini əhatə edən qabaqcıl təcrübənin Dövlət Gömrük Komitəsi Tibbi Xidmət İdarəsinin Mərkəzi Hospitalının gündəlik işində tətbiq edilməsi nəzərdə tutulub.