Aztibb.az-ın "Həkimlərimizi tanıyaq!" rubrikasında Elmi-Tədqiqat Tibbi Bərpa İnstitutunun böyuk elmi işçisi, həkim-nevroloq, neyrofizioloq, reabilitoloq Mərziyyə Məmmədova haqqında məlumatları təqdim edirik.
Mərziyyə Yusif qızı Məmmədova 2003-cü ildə Azərbaycan Tibb Universitetinin Müalicə-profilaktika fakültəsini bitirib. 2004-cü ildə ATU-nun Nevrologiya kafedrasında Nevrologiya ixtisası üzrə internatura keçib.
O, 2004-2007-ci illərdə Elmi-Tədqiqat Tibbi Bərpa İnstitutunun Nevrologiya şöbəsinin əyani doktorantı olub. 2007-2022-ci illərdə həmin institutunun Kliniki neyrofizioloji laboratoriyasında kiçik elmi işçi vəzifəsində çalışıb. “Transkranial və çoxsəviyyəli maqnit stimulyasiyasının insultdan sonrakı xəstələrin müalicə və bərpasında tətbiqi” namizədlik dissertasiyasının və iki müalicə - transkranial və çoxsəviyyəli maqnit stimulyasiyası metodikalarının müəllifidir.
Nevroloq həkim 2006-cı ildə Sankt-Peterburqda "Maqnit stimulyasiyası, stimulyasion elektroneyromioqrafiya, çağılırılmış potensiallar" üzrə sertifikatlaşmış kurslar keçib.
2014-2015-ci illərdə Sağlam Həyat Naminə İctimai Birliyinin "Sağlamlıq imkanları məhdud uşaqlar üçün ailə tipli kiçik qrup evlərin təşkili" layihəsində həkim-reabilitoloq kimi çalışıb.
Mərziyyə Məmmədova 2015-ci ildə Atlas Klinikasında, 2015-2017-ci illərdə AMT Klinikasında, 2017-2018-ci illərdə SEBA Koreya Şərq Təbabəti Klinikasında, 2018-2019-cu illərdə Bakı Bərpa Mərkəzində, 2019-2021-ci illərdə Referans Poliklinikdə, 2021-2022-ci illərdə isə West Hospitalda çalışıb. 2022-ci ildən Biosis Klinikasında fəaliyyət göstərir.
O, Azərbaycan, Türkiyə və Rusiyada ixtisasartırma kurslarında iştirak edib, beynəlxalq dərəcəli BLS, ACLS, PALS, NRP, Food Safety, ISO 9001 Health Management , GCP, Methods in scientific research+SPSS, İT Project Management, Data Science (R Language), İDİR sertifikatları alıb.
2019-2020-ci illərdə ATU-da İnsultun Menecmentinin Təkmilləşdirilməsi Proqramı İnsult Mərkəzinin yaradılması Pilot Layihəsinin İşçi qrupunun üzvü, təlimçi-exsperti olub.
Nevroloq həkim 2022-ci ildən Əziz Əliyev adına Azərbaycan Dövlət Həkimləri Təkmilləşdirmə İnstitutunun
Nevrologiya və Klinik Neyrofizologiya kafedrasının assistentidir. Həmçinin 2022-ci ildən Elmi-Tədqiqat Tibbi Bərpa İnstitutunda Kliniki neyrofizioloji laboratoriyasının böyük elmi işçisi vəzifəsində çalışır.
