Səhiyyə Nazirliyinin İctimai Səhiyyə və İslahatlar Mərkəzində (İSİM) “Azərbaycanda özəl tibb fəaliyyəti üzrə sorğu”nun yekun nəticələri ilə bağlı 15 dekabr 2022-ci il tarixdə dəyirmi masa keçirilib.

 

Aztibb.az İSİM-ə istinadla xəbər verir ki, İSİM-in direktoru Qəhrəman Haqverdiyev sorğunun nəticələri barədə geniş təqdimatla çıxış edib. O, İSİM tərəfindən 2021-ci ilin sonu 2022-ci ilin əvvəli ölkəmizdə özəl tibb müəssisələri arasında aparılan bu sorğunun səhiyyə sektorunun inkişafındakı aktual məsələlərə, o cümlədən problemlərə nəzər salan ilk irimiqyaslı sorğu olduğunu bildirib. Sorğunun məqsədi özəl tibb fəaliyyətində mövcud vəziyyəti, tibbi xidmətin keyfiyyətinin yüksəldilməsi, personal və pasiyentlərlə iş, icbari və könüllü sığorta, özəl təbabətdə informasiya texnologiyalarının tətbiqi və s. məsələləri öyrənmək olub.

 

Qeyd edilib ki, cəmi 108 sualın (o cümlədən İSİM ilə əməkdaşlıq haqqında 16 sual) yer aldığı sorğuya respublika üzrə fəaliyyət göstərən 61 özəl tibb müəssisəsi cəlb olunub və suallar müəssisə rəhbərləri tərəfindən cavablandırılıb. Sorğuya cəlb olunan tibb müəssisələrinin seçimi təsadüfi olub, sorğudan imtina nisbəti 3-5 faiz qeydə alınıb.

 

Dəyirmi masada sorğunun nəticələri geniş müzakirə olunub, iştrakçıları maraqlandıran suallar cavablandırılıb və ölkəmizdə özəl tibb fəaliyyətinin aktual məsələləri ilə bağlı səmərəli fikir mübadiləsi aparılıb