Ürək sağlamlığını qorumaq istəyən insan özünü stresdən, həyacandan və depressiyadan qorumalıdır.

Aztibb.az xəbər verir ki, bu barədə Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.

Onun sözlərinə görə, araşdırmalar göstərir ki, depressiyadan əziyyət çəkən insanların infarkt və insult riski daha yüksəkdir. Depressiyanın koronar arteriya xəstəliyi riskini 1,5-2 dəfə artırdığı sübut edilmişdir.

Cabir Gülmalıyev bildirib ki, koronar arteriya xəstələri arasında depressiyaya uğramış xəstələrin ölüm riski qeyri-depressiv xəstələrə nisbətən 3-4 dəfə yüksəkdir. Ölümün ən çox yayılmış forması ani ürək aritmiyasıdır.

Uzman həkim qeyd edib ki, koronar arteriya xəstəliklərinin depressiya, narahatlıq, tükənmişlik sindromu, qəzəb və kəskin stress kimi psixoloji faktorlarla, yoxsulluq kimi sosial faktorlarla əlaqəli olduğu göstərilmişdir.

"Xroniki stress bədənin "döyüş və ya qaç" reaksiyasını aktivləşdirir, qan təzyiqini yüksəldir və iltihabı stimullaşdırır.

Stress zamanı beynin amigdala hissəsində aktivliyin artması damarlarda və sümük iliyində iltihabın inkişafı ilə əlaqələndirilir", - deyə Cabir Gülmalıyev əlavə edib.