Tərtər Rayon Mərkəzi Xəstəxanasının əməkdaşları vətənimizin ərazi bütövlüyü uğrunda canından keçmiş şəhid Məhərzadə Taleh Oqtay oğlu və Surxayzadə Cahangir Hətəm oğlunun ailəsinə baş çəkiblər.

 

 

Aztibb.az-a Xəstəxanadan verilən məlumata görə, əməkdaşlar onlarla həmsöhbət olub, mənəvi dəstəklərini ifadə ediblər.

 

Görüşlər zamanı şəhidlərimizin müqəddəs amal uğrunda canlarından keçdiyini və onların hünərinin daim Azərbaycan xalqının yaddaşında yaşayacağı qeyd edilib. Şəhidlərimiz Taleh və Cahangirin qəhrəmanlıqla dolu döyüş yolları xatırlanıb, göstərdikləri igidlikdən bəhs olunub.

 

Şəhidlərimizin ailə üzvləri onlara göstərilən diqqət və qayğıya görə başda direktor olmaqla xəstəxana əməkdaşlarına minnətdarlığını bildiriblər.

 

Xatırladaq ki, Taleh Məhərzadə 28 sentyabr 2020-ci ildə Talış kəndi istiqamətində döyüş tapşırığının yerinə yetirilməsi zamanı şəhid olmuşdur. O, "Vətən uğrunda" medalı, "Laçının azad olmasına görə" medalı, "Suqovuşanın azad olunmasına görə" medalları ilə təltif edilmişdir.

Cahangir  Surxayzadə isə  9 noyabr 2020-ci il ildə Şuşa döyüşləri zamanı şəhid olmuşdur. Ölümündən sonra "Şuşanın azad olunmasına görə" medalı, "Vətən uğrunda" medalı və "Füzulinin azad olunmasına görə" medalları ilə təltif edilmişdir.