Avstraliyanın Kvinslend Universitetinin Beyin İnstitutunda Alzheimer xəstələrinin müalicəsi üçün yeni texnologiya hazırlanıb.

Aztibb.az medimagazin.com.tr-yə istinadla xəbər verir ki, klinik sınaqlarına başlanılan araşdırma üçün İnstitutda hazırlanmış UltraThera adlı yeni ultrasəs cihazı təcrübədən keçirilib.

Tədqiqat qrupu cihazla neyromodulyasiya effekti əldə edərək, Alzheimer xəstələrinin beynindəki sinir fəaliyyətini və ümumi beyin funksiyasını dəyişməyi hədəfləyib. Bu üsulun Alzheimer xəstəliyinin bəzi əlamətlərini yaxşılaşdıracağı gözlənilir.

Beyin İnstitutunun professoru Jürgen Götz bu tədqiqata 2015-ci ildə ultrasəsin yaddaş funksiyalarının bərpasına dair araşdırmadan sonra başlanıldığını bildirib. Onun sözlərinə görə, təxminən 12 xəstənin iştirak etdiyi sınaqlarda ilk 4 xəstə iki həftədə 4 dəfə müalicə olunacaq.