Bronxial astma tənəffüs yollarının xroniki iltihabı xəstəliyi olub, bronxların hiperaktivliyi ilə müşahidə edilən xəstəlikdir. Bu xəstəlikdə ağciyər yox, əsasən bronxlar zədələnir.
Aztibb.az xəbər verir ki, Kliniki Tibbi Mərkəzin həkim-terapevti Könül Bənənyarskayanın sözlərinə görə, bu mövsümdə havaların soyuması bronxları daha da qıcıqlandırır:
“Bronxların qıcıqlanmasına həmçinin tozlar, heyvan tükü, yunu, havada olan bitkilərin tozcuqları da səbəb olur. İltihab əleyhinə istifadə edilən aspirin dərmanı qıcıqlandırıcı təsirə malik olduğu üçün istifadə zamanı da bronxial astma xəstələrinə əks təsir göstərə bilər”.
K. Bənənyarskaya bronxial astma xəstəliyinin sadəcə irsi yolla deyil, həm də iqlim dəyişikliyi, ekoloji vəziyyətdən aslı olaraq yarana bildiyini deyir. İlkin əlamətləri isə boğulmalar, tənginəfəslik, döş qəfəsinin sıxıntılarıdır. Mütəxəssis boğulma tutmalarının başladığı zaman xəstənin məcburi hal ala biləcəyini istisna etmir:
“Boğulma tutmaları adətən gecə və ya səhərə yaxın baş verir. Boğulma tutmaları kəskinləşən zaman xəstə məcburi vəziyyət alır. Əllər dirsək nahiyəsində bükülür, stola və ya kürsüyə dirənərək çoxlu nəfəs almağa çalışır. Xəstə bununla ciyərlərin oksigenə olan tələbatını ödəməyə çalışır”.
Bronxial astma xəstəliyini müalicəsi individual formada aparılır. Belə ki, xəstəliyin hansı dərəcədə olduğu müəyyən edildikdən sonra müalicəyə başlanılır. Əsasən xəstəliyə səbəb olan faktorlar kənarlaşdırılır, mühit qıcıqlandırıcılardan təmizlənir.