Azərbaycan Tibb Universitetinin Tədris Cərrahiyyə Klinikasında (TCK) elmi seminar keçirilib.

Aztibb.az Klinikaya istinadla xəbər verir ki, seminarda TCK-nın Mama-ginekologiya və laboratoriya şöbələrinin, Klinik Tibbi Mərkəzin, Milli Hemotologiya və Transfuziologiya Mərkəzinin həkim və həkim-rezidentləri iştirak ediblər.

Seminarı klinikanın rezidentlər üzrə məsul şəxsi, Uşaq cərrahlığı kafedrasının assistenti Namiq Xəlilov açaraq, tədbirin TCK-nın klinik-mikrobiologiya mütəxəssisi, Elmi-Tədqiqat Tibbi Profilaktika İnstitutunun doktorantı Leyla Həşimovanın “Cinsi yolla yoluxan infeksiyaların diaqnostikasında təməl prinsiplər” mövzusuna həsr olunduğunu bildirib.

L.Həşimova çıxışında ÜST-nin məlumatına görə, hər gün 1 milyondan çox insanın cinsi yolla yoluxan infeksiyalardan birinə yoluxduğunu qeyd edərək diaqnostikasının vaxtında və doğru olmasının vacibliyindən danışıb. Həkim genital sistemin normal florasını bilməyin önəmini vurğulayaraq onun yaşa, Ph səviyyəsinə və hormon səviyyəsinə uyğun olaraq dəyişdiyini diqqətə çatdırıb. 

Məruzə ətrafında müzakirələr aparılıb, suallar cavablandırılıb.